Mesaje de Rosh Hashana 5763 por Rav Isak Haleva
Apoderado Gran Rabino, TurkiaKeridos Korelijionarios:
Terminando un anyo mas ayegimos a la entrada de un anyo nuevo, donde agradesemos al Sublimo Dyo ke mos dyo vidas i mos izo alkansar a estos diyas.Sigun los rekerimientos de nuestra santa ley los periodos semejantes son tiempos adekuados i mijores oportunidades para egzaminar intensivamente nuestras konsensyas sovre nuestros pensamientos i aktos kometidos en el anyo pasado i pronunsar nuestros repentimientos sinseros todo en refujiandomos a la perdonansa del Dyo Todo poderozo i regresar a un modo de bivir konforme a Sus enkomendansas.
Esto absolutamente siguro ke nuestros korelijionarios van aprovecharsen komo se deve de esta oportunidad Keridos korelijionarios.Profitando de esta okazion topo provechozo de rekordarvos una otra ves este presepto de nuestra santa ley: Nuestros eruditos rabinos nos dieron a saver ke; "Al shelosa devarim haolam omed: Al hatora veal haavoda veal gemilut hasadim (Sovre trez kozas se konsiste el universo: Sovre la ley, sovre la orasion i sovre el kumplimyento de bienfezensias."
La Tora fue el elemento el mas emportante unidario para nuestro puevlo disde el tiempo ke mo la regalo el sublimo Dyo por mano de nuestro gia Mose Rabenu, i arelumbro nuestra egzistensia en kada epoka en enkomendandomos preseptos de alta moral, grasyas a su divina partikularidad independiente de tiempo i lugar. La kontinuidad de esta situasion va ser devida de siguir al dependermos kon nuestra libre voluntad a estos preseptos i de ensenyarlos a nuestros ijos i mansevos afin de aserkarlos mas a nuestra santa ley. El seguir la kadena de "Lilmod ulelamed /Ambezar i ensenyar" sovre los estudios de la Tora deve de ser nuestro prensipal buto sigun fue en todas las jenerasiones. Esto bien konvensido ke nuestros korelijionarios van verser esfuersos en este kampo mas ke todos los tiempos. La orasion es uno de los kaminos mas emportantes ke mos aserka al Sublimo Dyo. Entremientes no kale neglijar ke todo modo de komporto bueno i akto djusto es una orasion adisionaria. Ma estos no pueden ramplasar nuestras orasiones diyarias. El empleo djusto de sus posibilidades de los miembros de nuestra komunidad i el akostrumbrarsen de orasionar en las sinagogas mos va aserkar demas entre nozotros i en un senso va ser komo el kriterio de nuestra unidad i solidaridad. En estos tiempos ke nesesitamos la unidad i solidaridad en todo modo de senso mas ke siempre , no duvdo ke nuestros keridos korelijionarios van aumentar sus sensibilidad en este asunto. La bienfezensa es uno de los komandamientos de nuestra santa ley i una de las kualidades ke determina nuestra egzistensya sosial.
Nozotros los Djudios semos renomados de estableser nuestras fondasiones de bienfezensa kaji en mizmo tiempo kon nuestras sinagogas. En estos diyas vos kero rekordar ke nuestras fondasiones de bienfezensa estan dispuestas para resivir todo modo de kontribusiones moral komo material de nuestros korelijionarios kon un profundo agradesimyento. Tengo la konfiensa ke el presepto de nuestra santa ley; "Mesameah et hamakom, mesameah et haberiot/ El ke kontenta a el Dyo es, el ke kontenta las kriansas" va siguir a ser una gia a todos nozotros, i van aumentarsen nuestros esforsos en kontribusiones.
Keridos Ermanos, Siendo yeno de estos pensamyentos i sentimyentos, rogo del Dyo Todopoderozo ke este anyo ke estamos en su entrada i los anyos vinyentes seyan para nuestro mundo i nuestra tierra, ansi ke para todos nozotros cuntos nuestras famiyas i nuestros keridos anyos de paz i repozo, de sanedad, prosperidad kon felisidad i vos bendigo kon mis bendisiones "Tizku lesanim rabot, neimot vetovot / Ayegados ke seash para munchos anyos buenos i ermozos."
Rav Isak
HALEVAApoderado
Gran Rabino
Keridos amigos, Es kon grande orgulyo ke vos mando este mesaje del Rav Isak Haleva, ke serkamente va ser el muevo Gran Rabino (Hahambashi) de Turkia. Rengrasyo a Rav Naftali Haleva, su ijo, ke me lo mando a mi. Rachel Amato Bortnick
English version translated by David Siman can be found here.
