SUJETO NEGLIJADO: LOS SEFARADIM EN LA SHOA
by Rachel Amado Bortnick,
founder of Ladinokomunita, and co-founder of the Ladino Preservation Council of the
Foundation for the Advancement of Sephardic Studies and CultureDesde la fin de la Sigunda Gerra Mondial en 1945, i sovre todo en los kavos 30 anyos, vimos una dokumentasion imensa de la katastrofia umana ke yamamos el Holokausto, o la Shoa. Se publiko estudios, testimonyos de sovrebivientes, livros, i artikolos; se establesyo muzeos, se produsyo filmos i programas de television, i mas. Ma en esto todo kaje ke no se mensionan los 160.000 Sefaradim[1] ke se deperdieron en la Shoa, ni el resultado katastrofiko de estas muertes para la kultura i lengua djudeo-espanyola. Solo en los kavos 10-15 anyos vimos la publikasion de livros eskritos por sovrebivientes Sefaradis, i estudios sovre la Shoa en las komunidades Sefaradis. Ma aun kon esto, el publiko en jeneral i el publiko Djudio en partikolar (I malorozamente munchos Sefaradim) tienen la yerrada empresion ke la Shoa toko solo a los Ashkenazim de Evropa.
En el 24 Marso 2003 tuvo lugar una seremonia grande i esmoviente en Auschwitz-Birkenau, asistida por sienes de Sefaradim de munchos paises, ande se inoguro la laja komemorativa en Djudeo-espanyol[2] en el monumento onorando las viktimas de este kampo de muerte. Ma el monumento mezmo fue enstalado en April 1967, kon vente lajas, kada una enskritas en una de las varias lenguas reprezentando las lenguas de los viktimas. Deke enstonses no se metyo la laja en djudeo –espanyol, lengua de unos 60000 Sefaradim ke fueron emprezados i kaje todos matados ayi? La razon es klara: mezmo los “ekspertos” ke izieron parte de la komite del monumento no savian ke los viktimas de Salonik i Rhodes en este kampo eran Sefaradim ke avlavan entre eyos, no el Grego (asigun les paresia), ma el Djudeo-espanyol. i estos “ekspertos” no savian tambien ke munchos viktimas de otros paises de Evropa eran de orijin Turko-Otomana, i ke eyos tanbien avlavan el Djudeo-espanyol. El profesor Haim Vidal Sephiha, sovrebiviente Sefaradi de Auschwitz (ke avia sido deportado de la Bejika) fue el ke se apersivio de esta mankura en el monumento, kuando el fue invitado a Polonya por un programa de radio en Marso de 2000, i retorno a Auschwitz por primera ves desde su liberasion en 1945. Despues de largos esforsos suyos i de Michel Azaria (I sus fondasion de JEAA), la laja en djudeo-espanyol fue enstalada finalmente en 2003.
La Shoa destruyo grandes komunidades Sefaradis en Gresia, Serbia, Bosnia-Hersegovina, Kroasia, Masedonia, Trakia, i las islas del Ege. Kontamos entre eyas Salonik (la mas grande, ke se yamava “Madre de Israel”), Belgrado, Sarayevo, Monastir, Rodes, Girit (Crete), i otras. Ademas, miles mas de Sefaradim fueron deportados djuntos kon todos los otros Djudyos de varios paises de la Evropa oksidental i oriental(de Fransya, Beljika, Austria, Romania, Hungaria, i Italia), i toparon la misma fin maloroza.
Los efetos direktos i indirektos de la Shoa fueron grandes en otros paises tambien. Por egzemplo, en Bulgaria, ke no deporto a sus Djudios, o Turkia, ke no entro a la gerra, uvo aktos antisemitas, i despues de la gerra las komunidades se enchikesieron drastikamente kon emigrasion masiva, jeneralmente a Israel.
La Shoa fue katastrofia para todos los Djudios, sin diferensia a Ashkenazi, Sefaradi, Romaniot, o otro. Ma komo Sefaradim mos kaye a entender ke los efetos de la Shoa fueron igualmente o mas traumatikos i katastrofikos para los Sefaradim i para la kultura i lengua djudeo-espanyola. Aunke los 160000 Sefaradim depedridos reprezentan una proporsion muy chika en los sesh milyones de Djudios asasinados, en proporsion a la populasion Sefaradi mundial[3], muestra piedrita fue muy grande. En este chiko espasio, podemos solo mensionar en kurto las komunidades ke fueron destruidas, porke kada una de eyas, komo la estorya de kada persona ke se deperdio o sovrebivio la Shoa, merese a lo menos un livro entero.
Komunidades Djudias de los Balkanes Destruidas en la Shoa
Empesando de Avril, 1941, kuando la Almanya atako a la Yugoslavia i Gresia, todas las komunidades Sefaradis de los Balkanes (kon la eksepsion de Turkia, ke no entro en la gerra) se toparon debasho del kontrol de Las Fuersas de la Aksis (los Almenes i sus aliados) i sus kolaboradores.
Aki damos una tabela del efeto de la Shoa en komunidades de rejiones ke oy estan en Gresia.[4]
KOMUNIDAD
DJUDIAPopulasion en 1941 Populasion en 1945 Porsentaje de piedridad Trakya Didimotika (Dimetoka) 900 33 99% Orestias 197 3 98% Alexandroupolis
Dedeagach)140 4 97% Komotini (Gumulcine) 819 28 96% Xanthi (Iskeçe) 550 6 99% Masedonia Kavala 2100 42 98% Drama 1200 39 97% Serres 600 3 99% SALONIK 56000 1950 96% Verria 460 131 72% Kastoria 900 35 96% Florina 400 64 84% Tesalia Trikkala 520 360 31% Larissa 1120 726 35% Volos 872 645 26% Gresia Vieja Chalkis 325 176 43% ATENA* 3000 4930 +64% Peloponeza Patras-Agrinion 265 142 43% Epirus Yanya (Yanina) 1850 163 91% Preveza 250 15 94% Arta 384 60 84% Las Islas Corfu 2000 185 91% Zante (Zakynthosla) 275 275 - Girit (Crete) 350 7 98% Rodos (Rhodes) 1701 40 97% TOTAL 77178 10066 89% *Nota: De la komunidad de Atena, 1000 personas se deperdieron. La pujita despues de la gerra es a kavza de los refujiados ke kedaron en la sivdad. (Nombres en turko adjustados por R.A.Bortnick)
Okupasion de Gresia por las Fuersas del Axis 1941-1944
Blu:Zona Italiana; Kolorado: Zona Almana; Vedre: Zona Bulgara
Komunidades Djudias en Gresia en 1941
Salonik
La mas grande komunidad de Gresia era la de Salonik. Los Almanes entraron a la sivdad en Avril 1941, ma el primer golpo a la komunidad fue en Julio de 1942, kuando 2000 ombres Djudios fueron arekojidos en el la “Plasa de Libertad” (Plateia Elepfteria) i forsados a kedar enpiez oras enteras, aharvados i arrebashados.[5] En presipio de 1943 Eichman i sus kolaboradores vinieron a la sivdad i empesaron sus fuertes persekusiones de Djudios, ovligando tanbien el vistir de la estreya amariya. Dieron el anunso mentirozo ke los Djudios ivan a ser transportados a Krakow, Polonia, para aresentarsen ayi kon el ayudo de los Djudios de akeya sivdad. Kaje todos lo kreyeron porke no tenian dingun haber de lo ke se estava pasando en Polonya. El primer treno de deportados Saloniklis arivo a Aschwitz Birkenau el 20 Marso kon 2800 personas. Los 2191 fueron imedietamente asasinados kon gaz. En todo uvo 20 “transports” de djudios de Salonik a Auschwitz, kon 48000 Djudios, de los kualos 37000 fueron imediatamente matados en las kameras de gaz. Del 30 April asta el 8 Mayo, los Almanes arestaron los Djudios de sivdades chikas en el norte de la Gresia (Orestias, florina, Veroia, Souflion, i Didimotikon) i los transferaron kon vapor a Salonik. Estos estavan en el 17en transport. El kavo treno a Auschwitz salio el 9 Mayo, 1943. Los ultimos Djudios deportados de Salonik fueron mandados al kampo de Bergen-Belsen en Augusto, 1943. Aki avian 74 miembros del “Judenrat” (Konsilyo Djudio) i 367 personas kon nasionalidad espanyola.
Siertos Djudios Saloniklis sirvieron komo sonderkomandos[6] en Auschwitz-Birkenau i tomaron parte en el revolto ayi en 7 Oktobre, 1944.
Pokos Saloniklis se salvaron en fuyindosen a las zonas Italianas, o en adjuntandosen kon la rezistensia. Lo mas no tuvieron la posibilita de fuyirsen o no perkuraron porke no tenian dinguna idea ande se estavan indo, i no se pudian imajinar el destino ke los asperava.
Trakya i Masedonia
En 1941 los Almanes dieron a la Bulgaria, komo regalo de sus aliansa, las rejiones de Trakya i Masedonia, i una parte de la Serbia oriental. En estas rejiones, ansi ke en Bulgaria propio, empozaron las persekusiones brutales de Djudios. En Marso 1943, los Bulgares arestaron 4000 Djudios de Trakya i los transportaron a kampos en el sudeste de la Bulgaria. Despues de dos semanas, se adjustaron 158 mas Djudios traidos de la sivdad de Pirot en Serbia, i todos estos fueron metidos en dos trenos i transportados a Lom (sivdad en el Danubio) i de aya los Alemanes los metieron en kuatro barkas en kamino a Viana. Ma el destino de estas barkas kedo un misterio. Unos dizen ke estos Djudios nunka yegaron a Viana; otros dizen ke ya yegaron a Viana i de ayi los Almanes se los yevaron kon trenos a Treblinka, i ayi fueron matados devista. Lo ke es siguro es ke ni una persona no kedo biva de estos transportes.
Tambien en 11 Marso 1943, la polisia Bulgara arekojo todos los 7,400 Djudios de Makedonia Yugoslava (Monastir, Skopye, i Shtip) i los emprezo en el depo de tobako “Monopol” en Skopye (Uskup.) De estos, 165 personas fueron liberadas - 65 doktores i farmasistos ke el governo tenia de menester, i otros de soditansia etranjera. El resto todos fueron transportados a Treblinka en tres trenos (entre el 22 i 29 Marso) i kaje todos matados de vista ayi. El kavo treno, kon 2404 Djudios (2300 de eyos Monastirlis) partio de Skopye el 29 Marso i arivo al kampo de muerte de Treblika el 5 Avril.[7] Aunke el governo Bulgaro fue tan brutal kontra los Djudios de Masedonia, en la Bulgaria propria no permetio la deportasion de los Djudios, ke nombravan unos 50000. (Esto konstitue otra estorya enteresante, sovre el kual se eskrivyo livros i se izo filmo dokumentario tanbien. )
En las zonas Italianas, los Djudios estavan mas bien tratados, aunke la Italia era aliada de la Almanya. Por esto 5000 Djudios (en mayoriya Sefaradim) de la zona Almana en Yugoslavia i de la Kroasia fashista se fuyeron a Dalmasia (el bodre de la mar Adriatika) ke era zona Italiana. Unos de eyos fueron aferrados por los Almanes despues ke kayo Mussolini, ma lo mas de eyos sovrebivieron protejados por los partizanes. Ma en todo, 7000-10000 Djudios de la Masedonya Yugoslava (Ashkenazim i Sefaradim) fueron deportados a kampos de muerte.
Entre 1941 i 1943, Atena i la Gresia del sud tambien estava en kontrol Italiana, i tantos se refujiaron aki ke la populasion Djudia de Atena pujo asta 10000 en 1943. Ma en Septembre de 1943 (despues ke la Italia se entrego a los Almanes i los Allmanes tomaron kontrol de todas las zonas Italianas) empeso todas las persekusiones Almanas aki tambien. El Granrabino Barzilai de Atena refuzo de ayudar a los Almanes, kemo todos los rejistros de la komunidad, i se fuyo. En Marso de 1944 800 Djudios fueron arestados en Atena. Entre Marso i Avril, los djudios de otras sivdades de Gresia, komo Yanina (Yanya), Arta, Preveza, Volos, Larissa, i Trikala fueron arestados . De Volos munchos parviinieron a fuyirsen kon el ayudo de siertos Gregos. Todos los arestados fueron emprezados en el maldicho kampo Haidari en Atena, i de ay, en Avril, 1944, 5200 Djudios fueron transportados en trenos a Auschwitz. Los Djudios de las islas de Rhodes i Corfu fueron deportados en Junio i Julio 1944. Ansi ke a la fin del enverano de 1944 la Gresia fue vaziada de todos sus Djudios. De la povlasion Djudia ke avia en la Gresia antes de la gerra, el 87% murieron en la Shoa. La katastrofia de Salonik fue la mas grave de todos.
Rodes i otras islas
La isla de Rodes (Rodos) apartenia a la Italia kuando empeso a la Sigunda Gerra. (Rodes era parte del Imperio Otomano de 1522 asta 1912, kuando paso a la Italia.) Los Italianos no les izieron danyo a los Djudios, ma en 1943 los Almanes okuparon Rodes i trokaron el destino de los 2000 Djudios ke bivian en la isla. La deportasion de los Djudios de Rodes fue la ultima de la Gresia, djusto tres mezes antes ke los Almanes fueron uvligados de salirsen de la Gresia. El 20 Julio 1944, 1700 Djudios fueron mandados kon vapor de Rodes a Gresia, tomando en kamino los Djudios de la isla de Kos. (Los ke tenian soditansa Turka i sus famiyas no fueron deportados, grasias al esforso del konsul Turko Selahattin Ulkumen, el kual fue onorado komo “Djusto de las Nasiones” por Yad Vashem en Yerushalayim.)
En kamino de ocho dias (solo para yegar a Gresia) murieron 23 personas de las kondisiones negras kon tanta djentoria, sin komida i sin agua, en la kalor fuerte. En Gresia los desdichados fueron metidos a asperar en el kampo de transito “Haydari”, i de aya fueron metidos en trenos i transportados a Auschwitz-Birkenau. Solo 151 Djudios de Rodes sovrebivieron la Shoa. Todos los 90 Djudios de Kos fueron matados. I mezmo las 2-3 famiyas Djudias de Chios (Sakiz) fueron deportadas i matadas.
En 21 Mayo, 1944, los Djudios de Girit (Crete) fueron arestados i deportados del porte de Rethymno (Resmo) kon vapor. Ma el vapor se ondio en mar (a kavza de un torpedo de los Aliados) i todos los pasajeros murieron, enterrados en las aguas.
Las islas de la mar de Ionia fueron dependientes de Venezia, i nunka estuvieron debasho de la egemonia Otomana. Antes de la Sigunda Gerra, la isla de Corfu tenia 2000 Djudios de varios orijines: Romaniotas (ke avlavan Grego), Sefaradim (ke avlavan el djudeo-espanyol), i Djudios-Italianos (ke avlavan el Italiano.) La fuersas Almanas okuparon la isla en 1943 despues ke los Italianos se entregaron, i en el 10 Djunio 1944 deportaron 1800 Djudios a Auschwitz. (Los 200 fueron eskondidos en kazas Kristianas.) De los desmazalados ke arivaron a Auschwitz (en Djulio, 1944) lo mas fueron matados, ma los Almanes deskojeron 435 para sirvir komo sonderkomandos. Ma estos refuzaron, preferando la muerte imediata.
En la isla de Zakynthosla (Zante) la estorya es mas alegre. Todos los 275 Djudios de la isla fueron salvados kon la entervansion del obispo (papaz) Krisostomos i el mayor Lukas Carrer.
Volos i otras sivdades de (proporsionalmente) mas poka piedrita
Antes de la gerra avia 880 Djudios en Volos, un porto de mar serka de Larissa, entre Salonik i Atena. En 25 Marso 1944 los Almanes dieron el orden de deportar los Djudios, ma grasias a los esforsos de la rezistensia EAM, el arkeobispo (patrik) Ioakim, i el Rabino Pesah, solo 130 fueron deportados a Auschwitz.
Asigun vemos en la tabela, en las otras sivdades de Tesalia (Trikkala i Larissa) ansi ke en Chalkis, i la Peloponeza, la piedrita de almas Djudias fue mas basha a kavza del ayudo de la rezistensia, o de personas umanas ke ayudaron a eskonder i salvar sus vizinos.
Eksterminasiones lokales en Serbia i Kroasia
En siertas rejiones de Yugoslavia, Djudios fueron matados sin ser deportados. En Serbia avia 16,000 Djudios, la mas grande parte Sefaradim, de los kualos 11,000 bivian en Belgrado, la kapitala de Serbia, I el resto en Nish, Smederevo, I otras sivdades. La persekusion de Djudios en Serbia empeso apenas entraron los Almanes Nazistos en Avril 1941. Todos los ijikos i ombres de edad de 16 asta 60 fueron devista mandados a kampos de lavoro duro, i todos eyos fueron matados en kurto tiempo por los miembros del Wehrmacht (soldados Almanes) i el SS. Todas las mujeres i kriaturas fueron emprezadas en 1941 en el kampo Sajmiste, en la sivdad de Zemun[8], serka de Belgrado. 7500 personas fueron matadas aki en 1942 kon gaz trayidos en kamyones. Ansi ke kaje todos los djudios de Serbia fueron matados en sus paises. 14,500 Djudios de Serbia fueron matados, ke es 90% de los 16,000 ke avia antes de la gerra.
Los masakros mas teribles de Evropa en la Sigunda Gerra akontesio en el estado de Kroasia, ke inkluyiva tambien Bosnia i Herzegovina, ande bivian unos 14000 Djudios en 1941, unos 1000 de eyos en Sarayevo (Bosnasaray o Saraybosna), 9000 Sefaradim i 1000 Ashkenazim. Sarayevo fue okupada por los Almanes en 17 Avril, 1941. Los Almanes destruyeron la kiyla Sefaradi de Sarayevo, arestaron i mataron sienes de Djudios. Las fuersas Fashistas de Ustasha del lider Pavlovich masakro unos 800000 Serbos durante la gerra[9]. Los Ustasha odiavan no solo a los Serbos ma a los Djudios tambien, i ayudaron a los Almanes. Kroasia apliko todas las persekusiones anti-Djudias de los Nazis, tomo todas las propriedads de los Djudios, i los ovligo a metersen la banda kon la estreya amariya en sus mangas. Munchos Djudios de Bosnia parvinieron a fuirsen a la zona Italiana en Dalmasia. Ma lo mas no pudieron fuirsen. En Septembre i Oktobrede 1941 los ombres Djudios de Sarayevo i otras sivdades fueron mandados a kompos komo Jasenovac, ande murieron del lavoro duro i kondisiones inumanas, o fueron brutalmente matados. Las mujeres tanbien fueron mandadas al mezmo kampo, i a otros en los primos mezes de 1942, kon el mezmo rezultado. A los ke kedaron bivos los Almanes los deportaron a kampos de muerte en Polonya.
En todo, unos 60000 Djudios de estas rejiones, la mas parte Sefaradim, fueron asasinados en la Shoa. Munchos tambien se salvaron en eskondiendosen ande amigos o vizinos, o indosen kon los partizanes.
Sefaradim en la Evropa
Komo ya mensionimos, avia munchos Sefaradim ke bivian en paises Evropeos. Una grande mayoria de estos eran de orijin Turka-Otomana, ke avian emigrado a la Evropa (sovre todo Frasia, Beljika, i Italia) en los primos 20-25 anyos del siglo 20. Asigun los raportos de Serge Klarsfeld, investigador de las detruksiones en la epoka Nazista, de los 80000 Djudios de Fransia deportados a la muerte, kaji 5000 eran de orijin Turka, i 1300 de eyos eran de nasyonalitad Turka. Entre el resto avia: Judyos de Bulgariya:140 , Eretz Israel: 53, Gresya: 1499, Yugoslaviya 133, Leban:2 , Syria: 17, Ejipto:18, ets.[10] Los esforsos de los diplomados Turkos salvaron unos 2000 Djduyos de soditansia Turka en Evropa, ma el resto de los Sefaradim tuvieron la mizma fin maloroza ke todos los otros Djudios de Evropa.
Konkluzion
La Shoa es un katastrofo ke toka a las mas profundas emosiones de kada Djudio, porke kada uno de mozotros semos un “sovrebiviente”. Komemorar, akodrar, i saver lo ke se paso es muestro dover, ansi ke rogar i lograr a ke nunka akonteska mas, ni a mozotros ni a dingunos. Es muestro dover tambien mantener la kultura Djudia, la kuala fue tanbien kaje asasinada por los Nazis en la Shoa. Komo Sefaradis sovrebivientes, mos kaye a mozotros salvar a la kultura i lengua ke era de muestros ermanos pedridos en la Shoa, i ke es la muestra tambien.
SELEKSION DE LOS MANADEROS KONSULTADOS:
Gutman, Israel, ed. Encyclopedia of the Holocaust, N.Y.: Macmillan, 1990
Rodrigue, Aron. “Sephardim and the Holocaust” (Konferensia de 19 Fevrero, 2004, publikada del Center for Advanced Holocaust Studies, i en el sitio www.ushmmm.org.)
http://motlc.learningcenter.wiesenthal.org/
http://death-camps.org/reinhard/deportfrance.html
http://www.rhodesjewishmuseum.org/holcaust.htm
http://www.ushmm.org/wlc/en/index.php?ModuleId=10005456
__________________________
© 2002 Rachel Amado Bortnick, Foundation for the Advancement of Sephardic Studies and Culture, NY
