Polvos i Luvya
Yashar SOFER / J Kori 11/2003
Muestra lingua es una rikeza ke tenemoz. Ay unas kozas ke se pueden eksprimar solo en la muestra lingua, ke yo, malgrado los akademisyanos ke insistan de yamarla Judeo-Espanyol, la yamo avlar en "Djudyo".Kada grupo chiko, serrado, ke seya en las chikas edades, en la eskola, en el grup de amigos, en los klubes de manseves, tyene un vokabularyo spesyal, ke solo los myembros del grup pueden entender. I de mas, estos byervos, ekspresyones i maneras de dizir kozas son bazadas sovre las unikas eksperiensas ke este chiko grup tyene. Lo ke es egzaktamente el kavzo por la lingua cudiya. Tenemos un "vécu", (vidas bividas kollektivas) ke se puede kontar solo en Djudyo.
Demandi a munchos, komo se dize "desmodrar" en Inglez, en Fransez, en Turko. No me pudyeron responder. I para esto, desidi de eskrivir en Djudyo, sovre lo ke se paso esta fin de semana. (las bombas de Neve Shalom i Shishli)
Es verdad ke puedemeos dizir, sovre esta trajediya, ke ya empesaron a desmodrarsen. I para los ke se desmodran, komo es dicho en la anektod, kale kitar los klavos i el martiyo del kashon,.
El problema es ke no tuvimos kuento ke la desmodrasyon empeso muncho mas antes.
No kon aksiyones, ma kon biervos, palavras, programas de televizyon, artikolos en los jurnales, kon los ke se kontan ekspertos en todo modo de siyensya sosyal, avlando i eskrivyendo sovre la situasyon, kon los militantes ke tyenen sus proprios agendas, kon los entelektuales de la iskierda ke se pensan muy muy intelijentes i savios, ke tyenen otra agenda, i todos enjuntos, se metyeron a pintar un tablo, ke mete el Cudyo a la orijen de todos los males.
Lo ke izyeron los fanatikes, los militantes i los entelektuales, en malavlando de los Cudyos, es komo echar polvos en el aire, para eskureser la verdad.
Todos saven ke kuando ay luvya, los polvos se tornan en lódos. Komo la dicha ke oyi de mis abuelos, me vino al tino ke "estos polvos trusheron estos lódos".
Kuando ay lodos en la kaye, no es koza buena. Es suzyo, no desha kaminar, kuvre la verdad.
I si ay muncha luvya, kon tante polvo, la persona se puede topar kuvyerta de lodos del piye a la kavesa. Entre tanto lodo, el hombre puede tanbien peryer el martiyo i los klavos ke va tener muncho menester.Agora mos kaye a todos, alimpyar estos polvos ke mos estan echando a la kavesa, neutralizar i amenguar la malavla kontinua ke estamos oyendo, antes ke ayga un otro mabul de luvya.
Si no, vamos a kedar aogados debasho los lodos.
