UN Kongreso Sovre Ladino en UNESCO
by Rachel Amado Bortnick,
founder of Ladinokomunita, and co-founder of the Ladino Preservation Council of the
Foundation for the Advancement of Sephardic Studies and Culture.Kualo se esta azyendo en el mundo para mantener, i promover el Ladino (Judeo-espanyol)? Kualo se deve i se puede azer mas? Estas fueron las kestiones prinsipalas ke se deskutyeron en Paris el 17-18 djunio, 2002, en el kongreso internasional sovre Ladino, ande asistieron djente de munchas partes del mundo ke lavoran kon ardor i entusiasmo para mantener el Ladino. Los payises i sus delegados ke partisiparon son:
Almania - Michael Halevy i Winfried Busse, Argentina - Hélène Gutkowski; Bulgaria - Dora Mantcheva i Vladimir Paounovsky; Espanya - Matilde Gini de Barnatan, Pilar Romeu, Salvador Santa Puche; Estados Unidos - Gloria Ascher, Rachel Amado Bortnick, David Siman; Fransia - Marie Christine Varol, Isaac Papo, Gaëlle Collin, Jean Carasso; Inglitierra - Claudia Roden ; Gresia- Erika Perahia Zemour; Israel - Moshe Shaul, Avner Pérez, Matilda Cohen-Sarano, Aldina Quintana, Aaron Cohen; Italia: Esther Fintz-Menasce, Laura Minervini; Portugal - Monique Benveniste; Serbia (Yugoslavia) - Drita Tutunovic; Turkia - Yusuf Altintash, Klara Perahya, Beki Bardavid, i el grupo muzikal Los Pasharos Sefaradis. Konsilyo Evropeo - JoséMaria Ballester. (Entre estos, los Estados Unidos i Serbia no son miembros de UNESCO.)
David Siman, Rachel Amado Bortnick, i Salvador Santa Puche
Esto fue la primera ves ke se izo un kongreso de Ladino en UNESCO (la Organizasyon Sientifika i Kulturala de las Nasyones Unidas) en el kuadro del "anyo de las Nasyones Unidas para el patrimonyo kultural", i debasho el patronaje del Sr. Koïchiro Matsuura, el Direktor jeneral de UNESCO. Los sinyores Jean Carasso, editor de la revista "La Lettre Sepharade" de Fransia, i Moshe Shaul, vise-prezidente de la Autoridad Nasyonala del Ladino i su Kultura en Israel, , lavoraron muncho tiempo i kon la asistensya del Sr. Yitshak Eldan, Emasador Israeliano en UNESCO, para organizar este enkontro.
Alhad, 16 Junio, un dia antes de la avyertura, mos reunimos todos los delegados en la kaza de la Sra. Arlette Burles para azer planos mas prechizos. I komo siempre en kazas sefaradis, la Sra. Burles i sus amigas mos resivyeron kon brasos avyertos, i kon una meza rika de komidas i dulseriyas tipikas sefaradis.
En la session de avyertura estavan prezentes los ambasadores de diversos payises al Unesco, ansi ke el reprezentante del Direktor-jeneral Matsura. El Sr. Jean Carasso izo la introduksyon, i los ambassadores Yitshak Eldan de Israel, i Francisco Villar de Espanya tomaron la palavra. Mos avlo tanbien el profesor Haim Vidal Sephiha, sovrebiviente de la Shoa, ke konsidero este kongreso komo una viktoria kontra los maldichos Nazis ke keriyan exterminar muestra kultura.
Claudia Roden i Jean Carasso
Mas de 300 personas incheron el salon de konferensya para oyir las sesiones de informasion i diskusion, ke trataron de los kampos de ensenyansa, transmision, konservasyon, kreasyon, i promosyon del Ladino, i de la erensya kultural de kantes, kuentos, poesiya, kumidas, etc. Se diskutyo tanbien el rolo de la media, inkluyo el Internet, i la publikasion de jurnales, revistas i livros. Los delegados avlaron sovre las aktividades en estos kampos en sus paises. Por egzemplo, la profesora Gloria Ascher avlo sovre sus kursos de djudeo-espanyol en Tufts University (la unika universita en Estados Unidos ande ay kursos de Ladino), David Siman sovre publikasiones i kursos informales en los Estados Unidos, i yo sovre Ladinokomunita, el foro de komunikasyon en djudeo-espanyol en el Internet. [1] Las prezentasyones fueron en Fransez, en espanyol, o en djudeo-espanyol, kon traduksyon instantanea solo entre Fransez i Espanyol. La Sra. Ester Fintz- Menasce de Milano presento un filmo maraviyozo, Rhodes Nostalgie (de Diane Perelsztejn, 1995) en memoria de su defunkta ermana Vioetta Fintz..
De las munchas informasiones interesantes ke se presentaron, notaremos ke:
A la fin del kongreso, Moshe Shaul mos prezento las rezolusiones tomadas para kontinuar i intensifikar los esforsos de mantener la lingua i kultura Sefaradi.
Jean Carasso mostro grande hospitalidad a los delegados, i el ambasador Bozkurt Aran de Turkiya honoro a los delegados de Turkiya o nasidos en Turkiya (komo yo) kon una komida elegante en su kaza el 17 djunio.
La fin del kongreso se fiesto kon un konserto maraviyozo de Los Pasharos Sefaradis de Istanbul en el salon de la Alliance Francaise de Paris, ande El Ambassador Aran asistyo tanbien.
El kongreso fue sigyido al dia del 19 Junio por la "Fiesta de Djoha" en el espasio grande de la Charcuterie de Vincennes, organizada por la Assosiasion Aki Estamos i Los Amigos de La Lettre Sepharade. Aki tanbien uvo muzika, kantes, kuentos para chikos I grandes, ansi ke komidas Sefaradis i vendidad de livros. La tadrada se termino kon "sketches" teatral prezentados por la bien konosida autora i poeta Sra. Mathilda Cohen Sarano djuntos kon Leon Sasson. La mizma tadre, el Professor Haim Vidal Sephiha dyo konferensya sovre las Biblias en Ladino en el Museo Djudio de Paris, al kual el aregalo una kopya de la famoza Biblia de Ferrara (1553.)
Este enkontro i kongreso Sefaradi en UNESCO mos permetyo de ver amigos viejos i konoser muevos, i mos dyo un entuziasmo redoblado para mantener muestra lingua i kultura. Asegun disho Moshe Shaul : " Mas ke todo, este renkontro reprezenta el rekonosimiento de la Unesco ke el Ladino I su tradisyon son emportantes i tienen ke ser prezervados. Estamos esperando ke la Unesko nos de su apoyo finansialmente, i asta ke esto se realiza, a lo menos tendremos su apoyo moral."
_____________________________
1. www.sephardicstudies.org/komunita/html
2. informasiones de Avner Perez en: maaleadum@barak-online.net
3. LPC se fondo por Rachel Bortnick, David Siman, i Bob Bedford. Para informasiones: info@sephardicstudies.org
© 2002 Rachel Amado Bortnick, Foundation for the Advancement of Sephardic Studies and Culture, NY
