LADINO

EL PURIM DE MI CHIKES EN IZMIR

por Selim Amado

Yo vide lo ke es "Oznei Aman", ke son las (Orejas de Aman), despues ke vine a bivir en Israel. En mi chikes en Izmir aviyan otras kozas ke karakterizavan la fiesta de Purim.

No aviya kaza ke no teniya una megila de Purim, guadrada, i ke se meldava noche de Purim en la Kehila (o el Kal). Ay ken teniya Megila kon kuti de plata, brodado de filigran, ma lo mas eran aryentro de kuti de tavla o de karton. Kuando el hazan del kal meldava los nombres de los ijos de Aman malgrado ke los meldava presto presto- todos davan los piezes en basho, para ke no vengan a los oyidos estos nombres ke eran asosiados al mal ke mos keria azer sus padre Aman "arasha". Tambien el "raashan", este aparato ke aze bruido es en Israel ke lo vide por la primera ves. Lo ke los Eshkenazim azen kon el "raashan", mozotros lo aziyamos kon los piezes !

Oyidos de Aman, "Oznei Aman", ke son una forma de biskochos en forma de triangolo, "Hamentaschen" , no ekzistiya, avia la Forka de Aman, formado de masa de "reshas", ke son un djenero de biskochos. Esto para akodrarmos de la fin de la persona ke kijo el mal de los Djudios. Aparte de esto avia la "Shamliya", i los "pinyonati", o los "mustachudos", todo - bien entendido- echo en kaza. De toda manera ya no aviya konditoria Djudia ke aziya esto, aparte los "maronchinos" i mogados (masapanes de Istanbul) ke se enkomendavan ande Taranto o ande el "shekerdji Israel".

Las "biskuchadas" o ( peksimet en Turko) eran solo del orno de Salhane ke era al lado de muestra kaza. Ningun otro orno kitava peksimet de la savor de este orno, me akdro de los garvansos ke metiyan a la agua en este orno i ke les serviya al otro diya de levadura (maya).

Lo ke kuajavan en kaza, komo los boyos i las borekas o las roskas de Shabat i de fiesta, teniyamos ke yevarlos kon "tavas" al orno, i para ke no se meskle kon las tavas de los otros, metiyan "isharet", ke era jeneralmente una kashka de guevo en la "koshe" de la tava.

El "Purimlik", era una suma de paras ke los parientes i los avuelos mos davan para ke mos merkemos lo ke keremos. Avia ke ir ande el "granpapa" i bezarle la mano para resivir el purimlik. En kaza era de uzo ke en salyendo del "kal", despues de la megila resivas el purimlik de los parientes. Estas sumas no eran del todo muy grandes. En las famiyas ekonomikamente mas fuertes se podia ver la "bisikleta" o la "kucha" (bebek) ke fueron aregalados por purimlik.

No aviya kriatura ke no saviya la konseja de Purim: Mordehay, Esther i enfrente de eyos el Rey Ahashverosh , al kual lo konvensieron komo Aman era el "rasha", el malo, el negro, al antisemit, el ke keria matar a todos los Djudios. I komo los Djudios se alegraron i fiestaron kuando se izo "rezil" Aman, i lo kaminaron en las kayes de la kapitala.

Purim era la sola fiesta Djudia onde se aziya "balo de Purim" o "Parti de Purim" onde ivamos degizados, ken kon "karatulas" (maskas), ken vistido de mujer, ken vistida de ombre kon kravata. Yo me akodro ke me visti "fez", i me ize barvika i mustachos desinados en la kara kon un tapon de mantar de bokal de vino ke lo kemavan i kon el karvon ke se formava aziyan makiyaje. Nunka aviya kriaturas vistidas de la Reyna Ester, o de Ahashverosh segun se uza en Israel, i nunka en la kaleja se iva kon maskas de Purim. Solo en las "mesibot" aryento de las kazas, i no todos se degizavan. La alegriya de Purim era mas muncho para los chikos, i no aviya ken beviya i se enborachava.

Ya sintiamos ke este anio Purim va kayer en "veAdar", ke es el mes de "Adar bet", una ves todos los kuatro anios. "Purim purinado Pesah en la mano" era la dicha para akodrar ke serkamente ya viene Pesah. Entre los muy observantes ya tengo sintido ke un dia antes de Purim las ke se yamavan Ester i los ke se yamavan Mordehay aziyan "taanit".

"Shushan Purim" no aviya, ma aviya siertas famiyas "Saragostis", deve de ser orijinarios de "Saragossa" en Espania ke tenian un sierto dia del anio onde meldavan una megila spesial. Kontavan ke uvo un Rey o komandante ke kijo anular en Saragossa a todos los Djudios kon sus livros santos, i kijo empesar por los livros de "Sefer Tora" de la kehila. El Shamas del lugar tuvo un esfuenio i vido ke esta era la intension del komandante enimigo de Djudios, se desperto i fue media noche al kal, kito los rulos de la ley de sus kashas , i se los yevo a su kaza. Ansina ke kuando vino kon sus soldados i empeso a kemar el "Aron Hakodesh" , los sifrei Tora se salvaron, i ansi ke los Djudios.

Verdad ke agora bivimos en Israel, i desde el Rosh Hodesh de Adar empesamos a sintir "mi she nihnas Adar marbim besimha", kere dizir ke del dia ke entra el mes de Adar empesamos a alegrarmos, porke en el 15 Adar es Purim, i vemos en las kayes las kriaturas, vestidos de Ahashverosh, de kovboy, de superman, de polis, de jeneral, i de las ijikas vistidas de Reyna Ester, o de balerina, o de otra figura. Kondtorias i supermerkados estan yenos de "Ozne Aman" , ma no ay mas akel "keyf" de las dulseriyas ke se uzava ver en kada kaza.

Ke pekado ke es un mundo ke no ekziste mas.

Selim Amado
Purim 5763 (2003)

 

Return to the Ladinokomunita