Los Sefaradis Del Caribe I El Esklavaje
por Mordehay Arbell
En un deskorso ke izo el 20 de Djulio 1991, el Prof. Leonard Jeffries, de la Univesidad de New York, akuzo a los djudios sefaradis de aver finansado el komersio de esklavos afrikanos traidos a las Amerikas. El disho ke este komersio era echo al lado de las sinagogas de Recife, en el Brasil 'holandez, i en las izlas del Caribe. El publiko ke oyo estas palavras las resivio kon aplauzos.
En el mizmo anyo, la "Nasion del Islam", organizasion de los muzuzlmanes pretos de Estados Unidos a la kavasera de la kuala se topavan Luis Farakhan i Haled Abdul Rahman, empesaron una kampanya anti-djudia al deredor de este tema, publikando tambien el livro "Las relasiones sekretas entre los djudios i los pretos", en el kual los sefaradis son akuzados otra vez de ser responsables por el esklavaje de los afrikanos en Amerika. En el livro se dize, por enshemplo, ke fueron los djudios de Surinam i Jamaica ke importavan i vendian los esklavos i ke eyos mataron a los revoltados afrikanos en Guyana i Surinam ke kerian la liberasion
Segun istoriadores konosidos este livro es yeno de mentiras, exajerasiones i invensiones, sin dar ninguna referensia de onde fueron tomadas las informasiones ke traye. Aun kon esto este livro se infiltro a algunas universidades amerikanas onde se krearon fakultades de estudios anti-djudios i se empeso a formar una onda de antisemitizmo al seno de los pretos de Estados Unidos.
Al prinsipio los djudios amerikanos no bushkaron a rempushar estas akuzasiones, pensando ke todos podian ver klaramente ke estas eran falsias i mintiras, i ke las insitasiones venian de parte de personas ke no eran seriozas, ke despareserian bien presto. Eyos no tomanron en kuento ke "La Nasion del Islam" es una organiasion finansada por los paizes arabos i espesialmrnte por Libia, djuntos kon organizasiones antisemitas. Esta koalision de pretos muzulmanos, arabos i antisemitas reusho a insitar a los pretos de Amerika kontra los djudios. Kuando se vido ke kalia responder, los faktores publikos djudios ke no konosian bien los verdaderos echos istorikos empesaron a publikar eskuzas en lugar de estudiar la istoria i ver kuala fue la verdadera situasion en este kampo.
El komersio de esklavos fue empesado, en 1595, por el rey de Espanya, Felipe II, ke tenia el monopolo de esta aktividad. Los djudios ekspulsados de Espanya no tenian dinguna parte en este ramo de la ekonomia.En 'Holanda, la "Kompaniya de India Oksidental (1664)" azia el komersio de esklavos i avia formado para esto un sentro en Curacao; aun ke los 'holandezes avian dado a los djudios una igualdad de derechos en todas las aktividades eyos les avian defendido de okuparsen kon la merkida i vendida de esklavos.
Los inglezes tambien ke avian formado "La Kompaniya Real Afrikana", no permetieron a los djudios de partisipar en este komersio.En los archivos de Danimarka ke tenia las Izlas Virjenes en el Caribe, ay dokumentos sovre 333 viajes de naves kon esklavos de Afrika a estas izlas. Ninguno de eyos no fue de djudios.
El fransez Gabriel de Bien, espesialista de la istoria del Caribe ekrivio ke "en todas sus investigasiones no topo ni un djudio ke partisipo en el komersio de ekslavos".
Uvo algunas eksepsiones. Felipe Henriquez de Curacao resivio permiso de azer el komersio de esklavos, ma fue eskrito ke este permiso no troka la defensa a los djudios en jeneral de merkar i vender esklavos.
En Jamaica uvo tres djudios ke se okuparon kon este komersio ma esto tambien era konsiderado komo una eksepsion. Esto fue todo. Kuatro djudios entre miles de merkaderes ke se okuparon durante siglos del komersio de esklavos es verdaderamente un numero menos ke minimo.
Proprietarios de esklavos
Si uvo djudios ke eran proprietariso de esklavos, esto era parte de la vida en el Caribe en los siglos 16, 17 i 18, ma en esto tambien los djudios fueron eksepsion. En Jamaica los djudios no tenian derecho de tener mas de dos esklavos i en Barbados uno solo. Esto era para ke los djudios no puedan tener fasilmente plantasiones agrikolas.
En Surinam i en la Martinique los djudios tenian plantasiones kon esklavos ma eyos preferavan emplear indianos nativos komo ovreros kon salario, en las plantasiones de kanya de asukar, kakao i vanilya. La mayoria de los djudios tenian esklavos ke lavoravan en sus kazas, ma eyos eran akuzados de tratar a sus esklavos demazia bien. No lavoravan en shabat i alhad ansi ke en las fiestas djudias i kristianas. A vezes los proprietarios djudios davan a sus esklavos un terreno para ke puedan kultivar sus propias guertas, en los dias libres, i vender sus produktos. Ansina en las kazas djudias uvo esklavos ke tenian su propio dinero.
Otro uzo fue de liberar esklavos despues de siete anyos de lavoro. Unos enshemplos: En Curacao, Isaac Cardoso d'Acosta libero en 1775, 17 esklavos, i en 1832 Abraham Isaac Henriques libero 11 esklavos. En Barbados, Luna Arrobas libero a su esklava Poly Grace i le pago 50 liras al ser liberada i 8 liras al anyo, pension para toda su vida. Estos enshemplos i otros mas eksplikan lo ke era dicho entre esklavos en las izlas 'holandezas del Caribe: "Bendicho el esklavo ke lavora en kaza djudia".
Kon la liberasion de los esklavos en el siglo 19 kale notar ke en munchos kavzos eyos preferaron kedar lavorando en las kazas djudias. Los ke lavoravan en las kazas de komersio de los djudios, kon los anyos yegaron a ser direktores i eredores de estas emprezas.
Munchos de los djudios ke tenian ijos de las esklavas kon las kualas bivian, los mandavan a estudiar en las universidades en Evropa. De Haiti los embiavan a Bordeaux o Bayonne; de Curacao i Surinam - a universidades de Amsterdam. Esta es la razon ke en estos paizes ay tantos patrones de profesiones akademikas, medikos, avokatos i mas, mulatos kon nombres djudios.
En Surinam esklavos liberados de djudios formaron una komunidad djudia yamada "Darkei Yesharim" (Kaminos de Djustos), i kon los anyos, kazandosesn kon djudios, eyos yegaron a ser parte de la komunidad djudia.
