DISTRAKSIONES DEL PADRE KON SU IJO
Michael Molho -
en Usos y Costumbres de los Sefardies de Salonica, paj. 88
(Trezladado del espanyol)La primera distraksion del padre feliz al tornar a su kaza a la tadre era distraerse kon su bebe. Lo metia sovre sus djinoyos, kon su kara frente a la suya, i abrasandolo kon los dos brasos, le dizia balansando su kuerpo de delantre a atras i de atras a delantre;
La Tora, la Tora
Mi fijiko a la havra
Kon el pan i el kezo
I el livriko al pecho.
-Ande vas, fijo del Dio?
-A meldar la ley del Dio
-El Dio ke te guadre
A ti i a tu madre
I a tu sinyor, ke es un buen djidio
I a la komadre ke te aresivio.Despues de esto el padre pasava a otro divertimiento ke tambien azia las delisias del bebe. Tomava una de las manos del chiko i karesando kon el indise el sentro de la palma dizia, kon una sonriza en los lavios: "Aki metio un gueveziko la gayinika". Despues serrava los sinko dedos i alevantandolos uno a uno, empesando por el pulgar, dizia:
Este dize: dame pan
Este dize:no ay mas
Este dize: vamos a rovar
Este dize: no, ke mos mata el rubi
Este dize: por aki, por aki, por ayi…I al prononsar la ultima fraza el padre pasava su mano a lo largo del braso del ninyo asta ke yegava a su garganta, onde le azia koshkiyas - lo ke azia riir al chiko.
